Светлагорск [Беларусь і сьвет]

Карысная інфармацыя

Надвор’е

Рэклама

Нашы сябры

Мой горад Светлагорск

Cветлагорскі блог

Светлагорск - ФК "Хімік"

Акцябрскі (Рудобелка)

Беларусь і сьвет RSS

Брыль і Сапега “прапісаліся” на мінскіх вуліцах

Як паведаміў БелаПАН старшыня рэспубліканскага грамадскага аб’яднання «Таварыства беларускай мовы імя Францішка Скарыны» Алег Трусаў, у лісце, які паступіў у штаб‑кватэру ТБМ з упраўлення культуры Мінскага гарвыканкама, паведамляецца, што ў Міністэрстве юстыцыі прайшло юрыдычную экспертызу рашэнне сталічнага гарсавета ад 30 лістапада 2007 г. аб наданні новым вуліцам у мікрараёне Міхалова‑1 імёнаў вядомага пісьменніка Янкі Брыля і выдатнага беларускага дзяржаўнага дзеяча XVI стагоддзя Льва Сапегі.

Гэта стала магчымым, лічыць А. Трусаў, дзякуючы пазіцыі кіраўніцтва ТБМ і падтрымцы жыхароў Мінска.

Нагадаем, што 26 верасня 2007 г. Мінскі гарсавет прыняў рашэнне аб прысваенні новым вуліцам сталіцы імёнаў Народнага пісьменніка Беларусі Я. Брыля і канцлера Вялікага Княства Літоўскага Л. Сапегі. Аднак Міністэрства юстыцыі падчас правядзення юрыдычнай экспертызы гэтага рашэння вынесла адмоўнае заключэнне са спасылкай на 15 артыкул Закона «Аб адміністрацыйна‑тэрытарыяльным дзяленні і парадку вырашэння пытанняў адміністрацыйна‑тэрытарыяльнага ўладкавання Рэспублікі Беларусь». Па меркаванні чыноўнікаў, падчас прысваення новых назваў мінскім вуліцам не была ўлічана думка насельніцтва. У гэтай сітуацыі 26 лістапада 2007 г. кіраўніцтва ТБМ звярнулася да жыхароў сталіцы з прапановай падтрымаць рашэнне Мінскага гарсавета па гарадскіх тапонімах і накіраваць адпаведныя лісты ў Мінскі гарсавет і Мінюст.

Старшыня ТБМ выказаў удзячнасць жыхарам сталіцы і дэпутатам Мінскага гарсавета за іх паслядоўную пазіцыю, дзякуючы якой у сталіцы з’явіліся вуліцы, названыя імёнамі нашых славутых землякоў.

Марат Гаравы (БелаПАН)

25.01.2008, 8:25

1. Леў Сапега.

2. Янка Брыль (ілюстрацыя на каляндарыку ТБМ). Фота: “Голас Радзімы”, golas.by