Светлагорск

Беларусь узнялася на 64 месца

У 2007 г. Беларусь заняла 64-е месца сярод краін свету па індэксу развіцця чалавечага патэнцыялу. Аб гэтым паведаміў выконваючы абавязкі прадстаўніка Праграмы развіцця ААН у Беларусі Леван Буадзе 27 лістапада на прэс-канферэнцыі ў Мінске. Сярод краін СНД Беларусь з'яўляецца лідэрам па адноснай колькасці карыстальнікаў сеткі Інтэрнэт.

Усе краіны ў спісе падзяляюцца на 3 групы - з высокім, сярэднім і нізкім узроўнем развіцця чалавечага патэнцыялу. Па словах Л. Буадзе, сёлета Беларусь ўпершыню патрапіла ў групу з высокім узроўнем развіцця чалавечага патэнцыялу. Па гэтым паказчыку яна на першым месцы сярод краін СНД. Пасля Беларусі ў СНД ідуць Расія (67-е месца), Казахстан (73-е), Украіна (76-е). Польшча і Літва, якія мяжуюць з Беларуссю, займаюць адпаведна 37-е і 43-е месцы.

Індэкс развіцця чалавечага патэнцыялу ў нашай краіне складае 0,804. Пры яго вызначэнні бярэцца пад увагу працягласць жыцця, узровень адукаванасці дарослага насельніцтва, валавы ўнутраны прадукт (ВУП) на душу насельніцтва. За год сярэдняя працягласць жыцця ў краіне вырасла на 0,5 года і дасягнула 67,8 года. Па гэтаму паказчыку Беларусь на 106-м месцы ў свеце. Па ўзроўню ВУП на душу насельніцтва Беларусь займае 72-е месца, па ўзроўню адукацыі дарослага насельніцтва – 33-е.

Першае месца па індэксу развіцця чалавечага патэнцыялу займае Ісландыя, апошняе, 177-е – Сьера-Леоне.

(БелаПАН)

Фота: un.by

***

Беларусь з'яўляецца лідэрам сярод краін СНД па адноснай колькасці карыстальнікаў сеткі Інтэрнэт, сведчаць даныя штогадовага "Даклада аб развіцці чалавека", які быў падрыхтаваны Праграмай развіцця ААН. У Беларусі на адну тысячу насельніцтва прыпадае 347 карыстальнікаў сусветнай камп'ютэрнай сеткі. У дзвюх іншых найбольш тэхналагічна развітых краінах СНД гэты паказчык ніжэйшы: Расія (152) і Украіна (97).

Па колькасці карыстальнікаў Інтэрнэта на тысячу насельніцтва Беларусь апярэджвае такія краіны Цэнтральна-еўрапейскага рэгіёну, як Балгарыя, Венгрыя, Польшча, Румынія і Чэхія.

Алена Ліхач (БЕЛТА)

Гл. таксама:

Мовазнаўца з вёскі Дуброва

ААН - аб парушэнні правоў чалавека ў Беларусі

Дзяўчына з Гомельшчыны пачала вучыцца ў Босніі і Герцагавіне

Беларуская дзяржава не абраная ў склад Рады ААН па прaвах чалавека

11% жыхароў Беларусі не ведаюць пра інтэрнет