Светлагорск

Беларусы Прыбалтыкі правялі фестываль

Сапраўдным святам беларускага мастацтва стаў ІІ-гі міжнародны фестываль "Спяваюць беларусы Прыбалтыкі", які прайшоў у вялікай зале гарадскога Дома культуры "Ругадзіў" г. Нарва (Эстонія). Мерапрыемства было арганізавана мясцовай беларускай суполкай "Сябры" пры ўдзеле генеральнага консульства Беларусі ў Таліне.

Як расказаў карэспандэнту БЕЛТА генконсул Аляксандр Астроўскі, больш як 600 гледачоў сустракалі авацыямі выступленні самадзейных артыстаў з беларускіх арганізацый краін Балтыі - ансамбляў "Надзея" (Рыга), "Світанак" (Вісагінас), "Алеся" і "Лянок" (Талін), "БЭЗ" (Йыхві - Кохтла-Ярве), "Крыніца" (Сілламяэ). Нават хор расійскага таварыства "Святагор", таксама запрошаны на фестываль, спецыяльна падрыхтаваў і праспяваў беларускую песню.

У прывітальным слове да ўдзельнікаў свята звярнуліся Аляксандр Астроўскі, прадстаўнік міністра па справах народанасельніцтва Эстоніі ў павеце Іда-Вірумаа Эрыка Крууп, старшыня Асацыяцыі беларусаў Эстоніі Ніна Савінава, старшыня Саюза беларусаў Латвіі Валянціна Піскунова, дырэктар культурна-асветнага цэнтра "Крок" горада Вісагінаса (Літва) Алег Давідзюк, прадстаўнікі муніцыпалітэта Нарвы, кіраўнікі беларускіх суполак Эстоніі. Было агучана таксама прывітанне Упаўнаважанага па справах рэлігій і нацыянальнасцей Савета Міністраў Беларусі Леаніда Гулякі.

Прадстаўнікі загранустановы і ўсіх арганізацый дыяспары прынялі ўдзел у пасяджэнні круглага стала на тэму "Беларуская прысутнасць у краінах Балтыі". Усе актыўныя удзельнікі фестывалю ўзнагароджаны граматамі генеральнага консульства і Нарвскага муніцыпалітэта, сувенірамі аргкамітэта.

Марыя Агафонава (БЕЛТА)

На здымках: эмблема Латвійскага таварыства беларускай культуры “Світанак”; беларускі фальклорны калектыў “Журавінка” (Латвія).

Выдадзены першы падручнік беларускай мовы для венгерскіх студэнтаў