Светлагорск

«Дзяды»: шэсце і мітынг у сталіцы

У Мінску ў нядзелю 28 кастрычніка прайшлі шэсце і мітынг, прымеркаваныя да традыцыйнага Дня памяці «Дзяды». Збор удзельнікаў акцыі пачаўся ля Парку Чалюскінцаў. Каля месца збору таксама былі супрацоўнікі міліцыі і КДБ у цывільным, міліцыянты, байцы спецназу.  

Пасля 11-й гадзіны удзельнікі шэсця пайшлі па маршруце праспект Незалежнасці — ўрочышча Курапаты. Над шэсцем рэялі бел-чырвона-белыя сцягі, сцягі Мінска. Арганізатарам шэсця з’яўлялася Кансерватыўна-Хрысціянская партыя - БНФ. Але ў натоўпе былі бачныя сцягі і іншых партый і арганізацый: Партыі БНФ, Беларускай сацыял-дэмакратычнай партыі (Грамада), "Маладога фронту" і г. д. Падчас шэсця калона вырасла, па розных ацэнках, да 1,5 - 2 тыс. чалавек.

Варта адзначыць, што гэтым разам да традыцыйных лозунгаў, якія прамаўляюцца падчас "Дзядоў", дадаліся і заклікі даць волю палітвязням Аляксандру Казуліну, Змітру Дашкевічу, Артуру Фінькевічу. Большасць кіроўцаў аўтамабіляў, якія праязджаюць побач, вітаюць ўдзельнікаў шэсця сігналамі клаксонаў.

Ва ўрочышчы прайшоў мітынг. На пачатку жалобнага мерапрыемства людзі памаліліся ля Крыжа пакутнікаў і праспявалі “Магутны Божа”. Удзельнікі акцыі ўсталявалі больш 10-ці крыжоў у месцы масавага тэрору. Сакратар управы Кансерватыўна-хрысціянскай партыі - БНФ Валерый Буйвал зачытаў удзельнікам шэсця і мітынгу зварот лідэра партыі Зянона Пазьняка. У звароце нагадваецца пра 1988 г., калі праз першае шэсце на Дзяды і пачалося новае беларускае Адраджэнне.

Інцыдэнтаў з міліцыяй не было, хоць калону ўвесь час здымалі на відэа з машын міліцэйскага суправаджэння. Нагадаем, што 2007 г. аб'яўлены грамадскасцю Годам памяці ахвяраў палітычных рэпрэсій.

(Радыё “Рацыя”)

Фота радыё «Свабода».