Светлагорск

З'езд "Беларусаў Расіі" адбудзецца ў Маскве

У будынку мэрыі Масквы 13 кастрычніка пройдзе III з'езд Федэральнай нацыянальна-культурнай аўтаноміі (ФНКА) "Беларусы Расіі". Як паведамілі карэспандэнту БЕЛТА у апараце Упаўнаважанага па справах рэлігій і нацыянальнасцей Савета Міністраў Беларусі, у рабоце з'езда прымуць удзел дэлегаты ад 16 рэгіянальных нацыянальна-культурных аўтаномій і прадстаўнікі 70 грамадскіх арганізацый беларусаў з рэгіёнаў Расіі.

Па даручэнню ўрада Беларусі ў з'ездзе прыме ўдзел група кіраўнікоў рэспубліканскіх органаў дзяржаўнага кіравання, у тым ліку Упаўнаважаны па справах рэлігій і нацыянальнасцей Леанід Гуляка, намеснік міністра інфармацыі Аляксандр Слабадчук і намеснік міністра культуры Валерый Гедройц, якія выступяць з дакладамі аб развіцці адносін і супрацоўніцтве з суайчыннікамі за мяжой.

Адбудуцца рабочыя сустрэчы беларускіх дзяржслужачых з кіраўнікамі і актывам ФНКА "Беларусы Расіі", з кіраўнікамі беларускіх аб'яднанняў у Расіі, СМІ беларускіх аб'яднанняў, удзельнікамі беларускіх культурных песенных і творчых калектываў.

У канцы з'езда адбудзецца ўзнагароджанне актыву і лепшых беларускіх грамадскіх арганізацый ганаровымі граматамі і падзячнымі пісьмамі за развіццё канструктыўнага супрацоўніцтва з Беларуссю і папулярызацыю культурнай спадчыны беларускай нацыі ў Расіі.

Уладзімір Васількоў (БЕЛТА)

На здымке: мэрыя Масквы. Фота virtualflowers.ru

Выдадзены першы падручнік беларускай мовы для венгерскіх студэнтаў