Светлагорск

Увечары 5 кастрычніка міліцыя пабывала ў кватэры Віталя Ешану, жыхара Слоніма (Гродзенская вобласць). Грамадзкі актывіст Алесь Масюк, які ў той час таксама знаходзіўся ў кватэры, паведаміў радыё «Свабода» па тэлефоне, што міліцыянты прыехалі нібыта на выклік у кватэру зверху, дзе ім не адчынілі. Міліцыянты зайшлі ў кватэру В. Ешану і адразу пачалі хадзіць па пакоях. Іх зацікавіў камп’ютэр.

“Да высвятлення абставінаў” міліцыянты забралі сістэмны блок, манітор і прынтэр. На думку А. Масюка, дзеянні міліцыянтаў супрацьзаконныя і выкліканыя ў першую чаргу занепакоенасцю ўладаў актыўнай дзейнасцю дэмакратычных маладзёвых арганізацый. Як паведаміла радыё “Рацыя”, міліцыя не паказала ордэр на вобыск, а свае дзеянні патлумачыла “аператыўнай неабходнасцю”. Маладзёвыя актывісты збіраюцца падаваць скаргу.