Светлагорск

ТБМ збірае подпісы за ўшанаваннe памяці Янкі Брыля

Па ініцытыве грамадскага аб’яднання “Таварыства беларускай мовы імя Францішка Скарыны” (ТБМ) у краіне вядзецца збор подпісаў з мэтай ушанавання памяці пісьменніка Янкі Брыля. ТБМ прапануе ўсталяваць мемарыяльную шыльду на доме, дзе жыў пісьменнік, і надаць яго імя адной з вуліц. Усе ахвотныя могуць паставіць свой подпіс, а падпісныя лісты будуць накіраваныя ў выканаўчы камітэт сталіцы Беларусі.

Збор подпісаў прымеркаваны да 90-годдзя з дня нараджэння народнага пісьменніка. “У сувязі з гэтым просім назваць у гонар класіка беларускай літаратуры адну з вуліц нашай сталіцы і адкрыць памятную дошку на доме, дзе жыў Янка Брыль” – гаворыцца ў звароце, пад якім падпісваюцца грамадзяне. Акрамя літаратурнай дзейнасці, Я. Брыль абіраўся дэпутатам Вярхоўнага Савета БССР, ён быў лаўрэатам дзяржаўных прэмій і ўзнагароджваўся ордэнамі.

У мінулы раз, летась, ТБМ збірала подпісы грамадзян за тое, каб сёлета ў Беларусі адзначаўся юбілей пісьменнікаў Я. Купалы і Я. Коласа.