Дэпутаты пазбавілі льготаў дзяцей і інвалідаў, але свае льготы адмяняць не зьбіраюцца

 

На здымку: дэпутат Палаты прадстаўнікоў Нацыянальнага сходу Рэспублікі Беларусь ад Сьветлагорскай выбарчай акругі, член Пастаяннай камісіі Палаты прадстаўнікоў па ахове здароўя, фізычнай культуры, справах сям’і і моладзі Валянціна Кавалёва.

 

 

 

 

Дэпутаты Палаты прадстаўнікоў Нацыянальнага сходу Беларусі прынялі 23 мая праект закону, паводле якога павінны быць адмененыя льготы для шэрагу катэгорыяў грамадзянаў. У той жа час дэпутаты не адмяняюць свае ўласныя льготы. Ніжэй разьмяшчаем пералік льготаў, якія адмяняюцца для грамадзянаў, і льготаў, якімі карыстаюцца самі дэпутаты.

Каго канкрэтна пазбаўляюць льготаў? Вось катэгорыі грамадзянаў і льготы, якія яны страцілі.

Вайскоўцы, супрацоўнікі органаў унутраных спраў, фінансавых расьсьледаваньняў, злучэньняў па надзвычайных сытуацыях і іх сямейнікі:

-          бясплатнае прадстаўленьне лекаў;

-          бясплатны праезд у адпачынак.

Былыя вязьні фашысцкіх канцлягераў, іншых месцаў прымусовага утрыманьня:

-          бясплатныя лекі;

-          бясплатны выраб і рамонт зубных пратэзаў;

-          бясплатны праезд у гарадзкім і прыгарадным транспарце.

Навучэнцы, вэтэраны працы, грамадзяне пры выкананьні службовых абавязкаў:

-          50-працэнтная зьніжка кошту праезду на пасажырскім транспарце.

Вучні і студэнты :

-          50%-ая зьніжка на праезд у гарадзкім і прыгарадным транспарце;

-          50%-ая зьніжка на праезд па краіне з 1 кастрычніка па 30 чэрвеня па суботах, нядзелях і сьвятах.

Дзеці да трох гадоў:

-          бясплатныя лекі.

Дзеці-інваліды:

            - 50%-ая зьніжка на праезд па краіне.

Дзеці з тэрмінальнай стадыяй хранічнай ныркавай няздатнасьці:

-          штогадовая грашовая кампэнсацыя выдаткаў на транспарт.

Людзі, што перанесьлі прамянёвую хваробу і сталі інвалідамі 1 - 2 групаў у выніку катастрофы на Чарнобыльскай АЭС:

-          бясплатныя лекі, выдаваныя на рэцэпты;

-          бясплатны праезд ад месца жыхарства да месца лячэньня;

-          50-працэнтная зьніжка на аплату за паслугі жыльлёва-камунальнай гаспадаркі;

-          беспрацэнтная пазыка на будаўніцтва жытла з пагашэньнем 50% за кошт бюджэту.

Акрамя таго, абмежаваная колькасьць катэгорыяў асобаў, якім прадстаўляюцца льготы па аплаце жыльлёва-камунальных паслугаў, мэдычных і паслугаў сувязі. Большасьці існуючых сёньня льготаў пазбаўляюцца чальцы сем’яў ільготнікаў, асабліва па аплаце жыльлёва-камунальных паслугаў і паслугаў сувязі.

Усё гэта прадугледжваецца паводле праекту закону “Аб дзяржаўных сацыяльных ільготах, правах і гарантыях для асобных катэгорыяў грамадзянаў”, які прынялі дэпутаты. 

У той жа час дзейнасьць саміх дэпутатаў Палаты прадстаўнікоў рэгулюецца законам “Аб статусе дэпутата Палаты прадстаўнікоў, чальца Савета Рэспублікі Нацыянальнага сходу Рэспублікі Беларусь”. У гэтым законе пералічваецца шэраг умоваў, якія мусяць спрыяць народным абраньнікам у іх дзейнасьці. Яны па-ранейшаму будуць карыстацца сваімі льготамі:

- усе дэпутаты Палаты прадстаўнікоў, незалежна ад пасады (за выключэньнем старшыні палат і іх намесьнікаў), атрымліваюць заробак міністра; апроч таго, кожны месяц ім кампэнсуюцца выдаткі, зьвязаныя з парлямэнцкай дзейнасьцю, якія не абкладаюцца падаходным падаткам;

- падчас выкананьня сваіх паўнамоцтваў дэпутаты Палаты прадстаўнікоў, чальцы Савету Рэспублікі маюць права карыстацца паветраным, чыгуначным, аўтамабільным, водным транспартам і ўсімі відамі гарадзкога і прыгараднага пасажырскага транспарту за кошт сродкаў, выдаткаваных з бюджэту; пасьля прад’яўленьня пасьведчаньня дэпутата агенцтвы, білетныя касы абавязаныя па-за чаргой выдаць яму квіток;

- дэпутату, які карыстаецца асабістым транспартам для ажыцьцяўленьня сваіх паўнамоцтваў, выплачваецца грашовая кампэнсацыя;

- народныя абраньнік маюць права на пазачарговую ўстаноўку кватэрнага тэлефона; дэпутаты вызваляюцца ад прызыву на вайсковую службу і ваенныя зборы.

- фармальна дэпутаты, якія працуюць на прафэсійнай аснове, ня могуць працаваць дзесьці яшчэ, аднак ім можна займацца выкладчыцкай, навуковай ды іншай аплочваемай дзейнасьцю.

- дэпутату выдаецца дыпляматычны пашпарт, які дае, напрыклад, перавагі пры перасячэньні дзяржаўнай мяжы.

(Паводле радыё “Свабода”.)

Фота: house.gov.by