Светлагорск

У Светлагорску зарэгістраваны кандыдаты ў Нацыянальны сход

У Светлагорскай выбарчай акрузе кандыдатамі ў дэпутаты Нацыянальнага сходу зарэгістраваны Сяргей Дайнека і Валянціна Кавалёва.  0,2% подпісаў не хапіла акруговай камісіі, каб прызнаць вылучэнне апазіцыйнага кандыдата С. Дайнекі несапраўдным. На паседжанні камісіі 27 жніўня прысутнічаў назіральнік ад грамадзян В. Болбас (на здымке), самі вылучэнцы, кіраўнікі іх ініцыятыўных груп і карэспандэнты мясцовых газет.

– Абодва кандыдаты вылучаліся шляхам збору подпісаў выбаршчыкаў, – гаворыць Вадзім Болбас, сябра Партыі БНФ. – За С. Дайнеку ў камісію прадаставілі 1208 подпісаў выбаршчыкаў. За В. Кавалёву – 4130; яна вылучана таксама ад вытворчага аб’яднання “Хімвалакно” і домабудаўнічага камбіната.

С. Дайнека – інжынер “Аўтасэрвіса”, сябра Партыі камуністаў. Беспартыйная В. Кавалёва з 2004 г. – дэпутат Палаты прадстаўнікоў, да таго была намеснікам старшыні Светлагорскага райвыканкама, а калісці працавала ў гарадскім камітэце таксама камуністычнай партыі. Пасля праверкі першых 200 подпісаў за кожнага вылучэнца камісія правяла два паседжанні 26 жніўня.

– На ранішнім паседжанні камісія прыйшла да высновы, што несапраўдныя подпісы за Дайнеку перавышаюць норму. У такім выпадку ў камісіі ёсць права дапаўняльнай праверкі. На працягу дня праверылі яшчэ 50 подпісаў. На вячэрнім паседжанні вызначылі, што з усіх правераных подпісаў колькасць несапраўдных – 14,8%, што не перавышае дапушчальную норму ў 15%. За В. Кавалёву камісія знайшла 2,8% несапраўдных подпісаў, – распавёў В. Болбас.

Акруговая камісія адмовіла В. Болбасу ў азнаямленні з дакументамі аб вылучэнні кандыдатаў, хоць артыкул 13 Выбарчага кодэкса прадугледжвае, што падрыхтоўка выбараў праводзіцца “адкрыта і галосна”. Акрамя В. Болбаса, у камісіі ёсць назіральнік з праўрадавага грамадскага аб’яднання “Белая Русь”, але ён на паседжаннях 26 – 27 жніўня адсутнічаў.

– Камісія ўручыла С. Дайнеку і В. Кавалёвай пасведчанні кандыдатаў – паведаміў В. Болбас. – Затым правялі жараб’ёўку чарговасці іх выступаў па радыё і тэлебачанні. Выступы на абласным радыё запланаваны на 3 верасня, на абласной тэлевізіі – на 19 верасня.

Гаворыць Святлана Міхальчанка, кіраўнік ініцыятыўнай групы апазіцыйнага кандыдата С. Дайнекі:

– У некаторых нашых падпісных лістах запісы былі зроблены розным почаркам. У выніку камісія зрабіла выснову, што ў зборы подпісаў удзельнічалі людзі, якія не ўваходзілі ў ініцыятыўную групу. Гэтыя лісты і склалі асноўную колькасць несапраўдных подпісаў.

На паседжанні камісіі было паведамлена, што заробак С. Дайнекі за мінулы год склаў 7.262.140 руб., ён мае аўтамабіль “ВАЗ”. В. Кавалёва за гэты ж перыяд зарабіла на дэпутацкім пасту 41.470.191 руб., мае ва ўласнасці кватэру ў 28,4 кв. м і аўтамабіль “Опель-Амега”.

"Праваабаронцы за свабодныя выбары"

spring96.org/be

(Фота А. Харланчука.)

Гл. таксама:

Выйшаў рэгіянальны бюлетэнь "Выбары-2008"

Светлагорск: падначаленыя камісіі

Рагачоўская ўлада ціснула на зборшчыка подпісаў

Спіс вылучэнцаў ад улады на Гомельшчыне

Светлагорск: “ціхая” кампанія без роднай мовы