З Ражджаством Хрыстовым!

Веруючы чалавек заўсёды з трапятаннем чакае светлага свята Ражджаства Хрыстовага. Таму што Таямніца Віфлеемскай начы не перапынілася, яна жыве і не вычэрпваецца, як не вычэрпваецца любоў Айца Нябеснага да роду чалавечага.

Успомнім, як сустрэлі Хрыста простыя і шчырыя пастухі. Яны паслухаліся Анёла, паспяшылі да Віфліемскай пячоры, убачылі Яго і з глыбокай пашанай пакланіліся Яму.

А вось шлях валхвоў да Хрыста доўгі і пакутлівы. Яле яны ішлі, пакуль не знайшлі Богадзіця, а калі знайшлі, пакланіліся і прынеслі Яму дары. Іхні шлях – гэта шлях усяго чалавецтва, шлях, па якім людзі ідуць да Бога, пераадольваючы шматлікія цяжкасці і перашкоды.

Жывучы ў гэтым свеце, усе мы, браты і сёстры, у якойсці меры падобныя ці тым жыхарам, якія не адчынілі свае дзверы для Прэсвятой Дзевы і Іосіфа, ці пастухам Віфліемскім, ці валхвам, якія ідуць на пакланенне. І як гэта важна, як радасна і выратавальна, што мы, дзякуючы Богу, прыйдзем у Яго дом – храм, каб тут праславіць Яго і пакланіцца Яму, як Богу і Цару. Няхай Ён знойдзе ў нашых сэрцах для Сябе яслі. Амінь.

Настаяцель храма святых апосталаў Пятра і Паўла,

благачынны Светлагорскай акругі

протаіярэй Уладзімір

Фота sn.by