Светлагорск

Пагоня на вуліцах Светлагорска

На здымку: індустрыяльны каледж на вуліцы Шашэйнай – каля яго разгортвалася кульмінацыя здарэння.

Вуліцы Светлагорска ў першы дзень новага году нагадвалі сцэны з амерыканскага “вестэрну”. Уладальнік аднаго з легкавых аўтамабіляў не тое пад уплывам выпітага ў навагоднюю ноч, не тое з якой іншай прычыны насіўся па горадзе з гучным ровам матору. За ім насілася міліцыя.

Гэта працягвалася болей за гадзіну. Урэшце, каля 16 гадзін на перакрыжаванні каля індустрыяльнага каледжу вадзіцель “Аўдзі” на вялікай хуткасці павернуў на вуліцу Шашэйная, ў накірунку маста праз чыгунку. Аўтамабіль не ўпісаўся ў паварот, перасёк паласу сустрэчнага руху і з’ехаў з узбочыны. Міліцэйскі аўтамабіль, які ўдзельнічаў у пагоні, рэзка затармазіў, ад чаго яго развернула на праезжай частцы. Добра, што тут з прычыны непрацоўнага дня было нешмат удзельнікаў дарожнага руху, і насустрач не рухаўся транспарт.

“Аўдзі” спыніўся ў прыдырожным кустоўніку, пазбегнуўшы сутыкнення з металічнай агароджай каледжа. Па словах відавочцаў, у пагоні былі задзейнічаныя 3 аўтамабілі, а кіраваў затрыманнем інспектар Кажадуб. Затрыманы парушальнік - мужчына гадоў 30-ці, прыстойна апрануты і саліднага выгляду. Пасля гэтага “Аўдзі” быў адбуксіраваны з месца затрымання. Міліцыя пакуль не паведамляе афіцыйную інфармацыю аб здарэнні.

svetlahorsk.belarda.org