Светлагорск

Міліцыянты зачытваюцца «Звычайным прэзідэнтам»

26 лістапада дазнавацель КДБ Аляксей Шагінаў прыйшоў да жыхаркі Светлагорска Святланы Міхальчанкі. "Я ў вас забраў камп’ютэр, я Вам яго і падключу", – сказаў капітан дзяржбяспекі.

«Некалькі дзён таму начальнік мясцовага аддзялення КДБ Аляксандр Праляткоўскі вярнуў мне і іншыя рэчы, якія раней забралі, – гаворыць С. Міхальчанка. – А сістэмны блок камп’ютэра, як мне сказалі, яны вазілі на праверку ў Гомель. Шагінаў прынёс яго і выказаў шкадаванне, што з-за ўсяго гэтага я мела турботы». Па словах жанчыны, камп’ютэрам яна толькі пачала карыстацца, і фактычна на ім нічога не захоўвалася.

Да пенсіі С. Міхальчанка была дырэктарам школы, цяпер актыўна выступае за захаванне сацыяльных гарантый для пенсіянераў, інвалідаў і моладзі. 14 кастрычніка, калі ў Менску праходзіў Еўрапейскі марш, на адной са светлагорскіх вуліц міліцыянты заштурхнулі С. Міхальчанку ў аўтамабіль. Яе прывезлі ў райаддзел міліцыі, дзе патлумачылі, што такім чынам “выклікалі ў якасці сведкі”. Затым супрацоўнікі міліцыі і КДБ паехалі разам з ёй дахаты на вобыск - сказалі, што шукаюць ноўтбук, які быў скрадзены ў чалавека, якога жанчына толькі крыху ведала.

Ноўтбука падчас вобшуку не знайшлі, але вынялі сістэмны блок настольнага камп’ютэра, друкаваныя выданні і дакументы Партыі камуністаў, да якой належыць актывістка. Забралі таксама візітоўкі, якія засталіся ў С. Міхальчанкі пасля сустрэчы з венесуэльскім прэзідэнтам Уга Чавесам.

«Пасля вобшуку я накіроўвала скаргі, настойвала, каб усё было вернута. На сёння дагэтуль не аддалі некалькі кніг кшталту «Звычайнага прэзідэнта». Сказалі, што кнігі чытаюць у міліцыі», – паведаміла С. Міхальчанка.

charter97.org

Гл. таксама:

Міліцэйскі начальнік у Светлагорску параўнаў Еўрапейскі марш з “маршам 41-га году”

Міліцыя ператрэсла кватэры людзей, якія супраць адмены сацыяльных гарантый

Допыт у КДБ у Светлагорску

Грамадзяне не атрымалі адказ ад Сьветлагорскага райвыканкама на заяву аб пікеце

У Сьветлагорску КДБ дапытаў Арсеня Ягорчанку