Светлагорск

28 кастрычніка ў Гомельскім раёне праведзена акцыя памінавення ў месцах масавых расстрэлаў людзей. Удзельнікі акцыі ўсталявалі памятны камень з надпісам «Пакутнікам тваім, Беларусь», паведамляе БелаПАН.

Акцыю наладзілі актывісты Аб’яднанай грамадзянскай партыі, Партыі БНФ, Партыі камуністаў беларускай, арганізацыйнага камітэта па стварэнню партыі “Беларуская хрысціянская дэмакратыя” (БХД), а таксама прадстаўнікі праваабарончых і іншых грамадскіх арганізацый. 1 кастрычніка каардынатары па стварэнню партыі БХД падавалі ў Гомельскі гарадскі выканаўчы камітэт заяву на правядзенне акцыі, аднак улады адмовіліся санкцыянаваць мерапрыемства. Удзельнікаў акцыі увесь час суправаджалі 2 аўтамабілі, з якіх невядомыя ў цывільным вялі відэяздымкі таго, што адбывалася.

На мерапрыемстве прысутнічалі больш за 50 чалавек. Акцыя пачалася на 9-ым км шашы Гомель – Чарнігаў, дзе ў 1994 г. быў усталяваны крыж у памяць ахвяраў палітычных рэпрэсій 1919 – 1940 гг. Намеснік старшыні абласной арганізацыі Аб’яднанай грамадзянскай партыі Уладзімір Кацора, выступаючы перад прысутнымі, адзначыў, што тут пахаваны людзі, якія былі прынесены ў ахвяру бесчалавечным бальшавісцкім рэжымам. “Мы павінны памятаць аб нашай гісторыі, каб не было паўтарэння такіх падзей. Гэта наша гісторыя, нельга аб ёй забываць“ – падкрэсліў Ул. Кацора.