Светлагорск

“Гомельская праўда” абвергла сваю публікацыю

18 кастрычніка ў судзе Чыгуначнага раёну Гомелю прадстаўніца дзяржаўнай газэты “Гомельская праўда” Алена Аленчанка пагадзілася без судовага разьбіральніцтва надрукаваць абвяржэньне сваёй публікацыі. З заявай у суд звярнуўся грамадзкі актывіст, сябар Аб’яднанай грамадзянскай партыі Леанід Судаленка.

Як напісаў у пазове ў суд Л. Судаленка, у артыкуле “Сваіх дзяцей — за мяжу, чужых — “у барацьбіты за дэмакратыю” (надрукаваны сёлета 2 жніўня), аўтар С. Грушэнка прыпісаў яму “ня толькі амаральныя, але нават і злачынныя дзеяньні”.

У артыкуле пісалася, што сябры закрытага ўладамі грамадзкага аб’яднаньня “Грамадзянскія ініцыятывы”, сябрам якога быў і Л. Судаленка, заклікалі моладзь удзельнічаць у антыграмадзкіх мерапрыемствах. Было напісана, што сын актывіста паехаў на вучобу ў Польшчу паводле праграмы для апазыцыйных актывістаў, хоць у дзейнасьці апазыцыі ўдзелу ня браў.

Л. Судаленка папярэдне зьвяртаўся ў рэдакцыю газэты — патрабаваў абвергнуць несапраўдныя зьвесткі, але адказу не атрымаў. Таму і зьвярнуўся ў суд з пазовам пра абарону гонару й годнасьці.

Радыё «Свабода»