Светлагорск

Падарунак з Магілёва

Яшчэ зусім нядаўна карцінная галерэя «Традыцыя» імя Германа Пранішнікава ў сваім мастацкім фондзе не мела ніводнага скульптурнага твору. Мабыць, гэта было не зусім справядліва, бо і яна спрыяла правядзенню штогадовых рэспубліканскіх пленэраў скульптараў, ладзіла іх выставы. Першым паказаў добры прыклад Эдуард Астаф'еў – аўтар помніка Шацілу, заснавальніку Вострава Шацілінскага. Ён ахвяраваў нам спачатку эскіз скульптурнай выявы нашага слыннага земляка з вёскі Данілоўка, акадэміка мовазнаўства Сцяпана Некрашэвіча. А потым – яшчэ 7 сваіх твораў.

Эдуарда Барысавіча падтрымалі і іншыя ўдзельнікі апошняга пленэру: Валерый Казлоўскі, Уладзімір Конанаў, Аляксандр Камардзін. Цудоўнай выявай «Яніны» папоўніў фонд і магілёўскі скульптар Карней Аляксееў. Нагадаем, што ён – член Беларускага Саюза мастакоў, неаднаразова паказваў свае творы на самых прэстыжных мастацкіх выставах. Паспяхова працуе ў жанры манументальнай і станковай скульптуры. Многія творы Карнея Іосіфавіча захоўваюцца ў музеях Беларусі, краін Садружнасці, а таксама ў Францыі, Італіі, Балгарыі... Светлагорцы ведаюць, што ён аўтар некалькіх выяў, якія ўпрыгожваюць наш горад. Сярод іх «Фаўна» і «Казачнае вандраванне».

І вось прыемная навіна. Да 15-годдзя карціннай галерэі Карней Іосіфавіч падрыхтаваў яшчэ адзін падарунак – ахвяраваў 7 твораў малых скульптурных форм, зробленых з гіпсу і дрэва. Амаль усе яны належаць да партрэтнага жанру: «Студэнтка Аня», «Будаўнік А. Кірылава», «Муса Джаліль», «Прашу слова». Скульптар здолеў перадаць не толькі знешнюю, але і духоўную прыгажосць герояў сваіх твораў. Зрэшты, і ў іншых працах («Мутант», «Сон слімака») дасягае майстэрства, якое пераканаўча сведчыць аб яго самабытным таленце.

У светлагорцаў ёсць цудоўная магчымасць пабачыць гэтыя скульптурныя творы ў нашай чарговай экспазіцыі.

Ізяслаў Катляроў (Ранак-плюс. 2007. № 40.)

Фота mk.by.

На здымке: скульптура К. Аляксеева “Казачнае вандраванне”. Фота kimpress.by

Гл. таксама:

Юбілейны вернісаж

«Незвычайная звычайнасць» Ларысы Журавовіч

Непадалёк ад міліцыі сапсавалі скульптуру

Падарунак скульптара

Фарбы зямлі і неба