Светлагорск

Допыт у светлагорскім КДБ праводзіцца перад 25 сакавіка

Арсені Ягорчанка, 11-класнік сярэдняй школы № 10, выкліканы на паўторны допыт 24 сакавіка у Светлагорскае аддзяленне Камітэта дзяржаўнай бяспекі. Допыт прызначаны на 14 гадзін. На мінулым тыдні Арсеня ўжо дапытвалі ў КДБ.

23 сакавіка капітан дзяржаўнай бяспекі Аляксей Шагінаў уручыў Арсеню павестку аб тым, што хлопец павінен зноў прыбыць на допыт у Светлагорскае міжраённае аддзяленне КДБ. Прычына допыту, якая пазначана ў павестцы - крымінальная справа, якую КДБ вядзе ў Мінску супраць Барыса Гарэцкага, Алега Корбана, Дзмітрыя Федарука і непаўнагадовай Настассі Палажанкі. Гэтыя маладыя людзі падазраюцца ў прыналежнасці да незарэгістраванай арганізацыі “Малады фронт” (гл. інфармацыю за 18 сакавіка).

Як паведамляюць сродкі масавай інфармацыі, аналагічныя павесткі на 24 сакавіка атрымала ў краіне вялікая колькасць маладых людзей. Гэта дае падставу меркаваць, што выклікі па павестках накіраваныя на тое, каб прадухіліць удзел моладзі ў адзначэнні 25 сакавіка Дня Волі – 89 гадавіны абвяшчэння Беларускай Народнай Рэспублікі.